ابڙو اڪيڊمي Abro Academy
2020-07-18
داخلا نمبر 533
عنوان ڪٻر ننڍي
شاخ پکي
پڙهيو ويو 365
داخلا جو حوالو:
ڪٻر ننڍي
20 سينٽي ميٽر جسامت جي هيءَ ڪٻر ڏسڻ ۾ عام ڪٻر کان گهڻو مختلف نه آهي، انڪري اڪثر ماڻهو هن کي به عام ڪٻر ئي سمجهندا آهن. پر ٿورو ئي ڌيان ڏبو ته هن ڪٻر جون جدا وصفون ڏسي سگهبيون. هيءَ ڪٻر رنگ ۾ عام ڪٻر کان ڪجهه مختلف آهي. قد بت به عام ڪٻر کان ڪجهه گهٽ اٿس. بالغ ڪٻر جي اک واري پاپڙيءَ ڳاڙهسري نارنگي ۽ چهنب به نارنگي ڳاڙهي هوندي آهي. پرن جي ڪناريءَ وارن کنڀن تي نارنگي ۽ ڀورو چٽو ٿئيس ٿو . پڇ جي پڇڙي به نارنگي ۽ ڀوري هوندي اٿس. مٿو ۽ ڳل چمڪيلو ڪارو ناسي اٿس ڄڻڪ نقابي ڪنٽوپ پاتل هجيس. جسم نيرانجهڙو سرمائي ٿئيس ٿو. گلو، ڳچي، ڇاتي ۽ باقي اندريان کنڀ عام ڪٻر وانگر اٿس. ۽ پيشانيءَ تي ننڍڙو پر تمام نمايان مُچو ٿئيس ٿو. پڇ جي هيٺان ۽ اندريان کنڀ ڀورا اٿس. ٻچي جو رنگ سادو ۽ ڦِٽل ڦِٽل ٿئي ٿو، مٿو ۽ ڪنپٽي گهري ناسي ٿئيس ٿي.
ٻوليون عام ڪٻر جهڙيون اٿس پر آواز اوترو اوچو ڪونه ٿئيس. عادتون به عام ڪٻر جهڙيون اٿس پر ان کان ڪجهه وڌيڪ گروهه پسند آهي. لڳ جي مند ۾ عام طور ننڍڙن ولرن جي صورت ۾ ۽ سياري ۾ وڏن ولرن ۾ هوندي آهي. ٻين جنسن جي پکين سان وڏي تعداد ۾ رات جو آرام ڪندي آهي. پٽ تي خوراڪ ڳوليندي آهي. گاهه خور چوپاين تي سوار ٿي ان تي چنبڙيل جيت ڳوليندي نظر ايندي آهي.
آباد پوکن ۾ رهندي آهي، واهه جي ڪپرن، سم نالين ۽ گِهميل چراگاهن ۾ ۽ اتي رهي ٿي جتي مال ۽ ڳوٺ ويجها هجن. شهرن ۽ ڳوٺن ۾ به ڏِسبي آهي. مارچ آگسٽ ۾ افزائش نسل ڪري ٿي. هي ڪٻرون 50 کن جي تعداد ۾ گڏيل ڪالوني ٺاهي رهن ٿيون. آکيرو اڀڪپرين ڀِڪن ۾ سواخ کوٽي ٺاهين ٿيون. يا وري ڪڏهن درياهه، ندي، واهه، بند، يا روڊ جي ڀِڪ ۾ قدرتي ڏرڙ ۾ آکيرو ڪري ٿي.
پاڪستان کان بنگلا ديش ، گجرات بمبئي تائين ٿئي ٿي. سنڌ ۽ پنجاب ۾ عام آهي، خاص ڪري ساريال جي ميداني علائقن ۾ ٿئي ٿي.